Коронавирусга қарши кураш штаби аъзоси Барно Абдусаматова ўзини-ўзи ҳимоялаш тартибига ўтилиши кераклигини таъкидлади. У мазкур масала юзасидан интервью берди.
Абдусаматова мамлакатимизда коронавирус билан боғлиқ ҳолат унчалик яхши эмаслигини айтди. Шундан келиб чиқиб, мутахассис фуқаролар ўзини-ўзи ҳимоялаши кераклигини ва шифокорларнинг тавсияларига қулоқ солиш лозимлигини таъкидлади.
“Сентябрь ойи бошларида сутка давомида коронавирус 343 кишида аниқланган бўлса, 9 сентябрга келиб ушбу кўрсаткич 406 нафарга етди. Бу карантин юмшагандан сўнг фуқаролар бир-бирлари билан кўпроқ мулоқот қилаётгани учун юзага келди. Аксарият фуқароларда бемалоллик кузатилмоқда, лекин бундай қилиш керак эмас. Коронавирус ёнимизда эканини унутмаслигимиз ва соғлиғимизга эътиборли бўлишимиз керак. Шахсий гигиенага риоя қилиш ва кўчага ниқобсиз чиқмаслик керак”, – дейди Абдусаматова.
