Профессор Маърифат Ганиева вафот этди. Бу ҳақда EVERYDAY.UZ мухбири хабар қилди.
Маълум бўлишича, кеча, 23 сентябрь куни Социология ва Ижтимоий иш соҳаси ривожига катта ҳисса қўшган олима, социология фанлари доктори, профессор Ганиева Маърифат Хабибовна 74 ёшида оламдан ўтган.
Ганиева 1947 йил 13 февралда Тошкент шаҳрида таваллуд топган. У фаолияти давомида «Социология», «Маданият социологияси», «Ижтимоий иш назарияси», «Ижтимоий иш тарихи», «Ижтимоий ишнинг ҳуқуқий асослари», «Этносоциология», «Оилалар билан ижтимоий иш» каби дарсликлар ҳамда ўқув қлланмаларни ўзбек ва рус тилларида чоп эттирган.
Ўзбекистон Миллий университетида профессор Маърифат Ганиева «Ижтимоий жараёнлар ва муносабатларни тадқиқ этиш, ижтимоий ишни ривожлантириш” илмий мактаби яратганди. Мамлакатимизда Ижтимоий иш соҳасининг асосчиларидан бири, фидойи олима, етук устоз Маърифат Хабибовна Ганиеванинг порлоқ хотираси сафдошлари ва шогирдлари қалбида сақланиб қолади.
