Сенатор Дилором Тошмуҳамедова раҳбарлик қиладиган «Оила» илмий амалий-тадқиқот маркази ажралиш ҳолатлари кўп бўлган вилоятларда ажралиш сабабларини ўрганди, дея хабар қилмоқда Daryo-Live.
Маълум бўлишича, оиладаги доимий жанжал ва можаролар, эр-хотин ўртасида бир-бирини тушуниш ва тотувликнинг йўқлиги (22,5 фоиз) асосий сабаблар сифатида кўрсатилган.
Шунингдек, ажралишларнинг сабабларидан яна бир алкоголизм (11,0 фоиз) эканлиги аниқланган. «Спиртли ичимликлар ичишга асосан эркаклар мойил бўлади. Оила бошлиғи бўлган эркакларда ирода, сабр-тоқат ва мардлик каби шахсий етуклик сифатлари тарбияланмаганлигидан алкоголизмга мойилликлари орта боради», — дейилади марказ ахборотида.
Давлат статистика қўмитаси маълумотларига кўра, Ўзбекистонда 2018 йилнинг январь—октябрь ойларида никоҳдан ажралишлар сони 2017 йилнинг шу даврига нисбатан 2,0 фоизга ошган (26 288 тадан 26 812 тага кўпайган). Масалан, Андижон вилоятида ажралишлар 26,7 фоизга, Тошкент шаҳрида 21,3 фоизга, Сурхондарё вилоятида 9,5 фоизга ортган.
