Тошкент вилоятида судья уй қамоғидаги фуқаронинг зиёфатига бориб келгандан сўнг уни озод этди. Бу ҳақда Дарё нашри маълум қилди.
Кеча хабар қилинганидек, 30 ноябрда олий судда матбуот анжумани бўлиб ўтди. Унда коррупцияга қарши курашиш агентлиги вакили Умида Тўхташева иштирок этиб, судьлар билан боғлиқ коррупцион ҳолатлар ҳақида гапирди. Тўхташева шундай вазиятлардан бири Тошкент вилоятида содир бўлганини билдирди. Унинг айтишича, шу йил май ойида вилоятдаги шаҳарларнинг бирида ишловчи судьлар Л.Н ва Р.О.лар айни карантин вақтида, уни қўпол равишда бузиб, базмга борган. Улар навбатдаги жинояти учун озодликни чеклаш жазосини олган Д.Н.нинг туғилган кунини нишонлаган. Базмда 100дан ортиқ меҳмон иштирок этган.
Эътиборли жиҳати, судья ўша шахснинг зиёфатига бориб келгандан сўнг, бироз вақт ўтгач, Д.Н.ни озод этган. Эслатиб ўтамиз, аввалроқ Тошкент вилояти суди судьяси ЙПХ ходимини ҳақоратлаб, кийимини йиртиб, унга тан жароҳати етказгани ҳақида ёзган эдик.
