Аввалроқ тармоқларда самарқандлик ёш йигит ўз отасига қўл кўтаргани ҳақида хабарлар тарқалди. Ҳодиса кўплаб муҳокамаларга сабаб бўлгандан сўнг фарзанд ва ота ТВ-шоуга яраштириш учун таклиф этилди.
Ёш йигит отасини урмаганини айтмоқда. Йигитнинг айтишича, унинг отаси икки фарзандлик, аввал турмушга чиққан аёлга уйланишга қаршилик қилмоқда.
Йигитнинг отаси эса ўша аёл бир неча эркаклар билан юрганини билишини ва шу сабабга кўра ўғлининг унга уйланишига ҳеч қачон рози бўлмаслигини таъкидлади. Шунингдек, ёш йигитнинг отасининг айтишича, у ўғлига яхши оиланинг қизига уйланиши учун Нексия-1 автомобили сотиб олиб берган. Лекин, кейинчалик ушбу машинани ўша йигит яхши кўриб қолган аёл ҳайдаб юргани маълум бўлган.
“Ўғлим мени фарзандли аёлга уйланишга розилик бермаганим учун урди. Уни менинг катта фарзандим тўхтатиб қолди. Биз уни ўша аёлнинг уйидан бир неча бор олиб кетганмиз. Ҳар қандай ҳолатда ҳам бу никоҳга қаршиман”, – дейди ота.
Таъкидлаш жоиз, ёш йигит ҳар қандай ҳолатда ҳам ўз севгисидан воз кечмоқчи эмас. Нима қилиб бўлса ҳам у ўша аёлга уйланмоқчи. Йигитнинг отаси ўғли у аёлга уйланса ундан воз кечишини айтди. Маълум бўлишича, ушбу оила Самарқанд вилояти Каттақўрғон шаҳрида яшайди. Ёш йигит у отасини урди деган хабарлар тарқалгандан сўнг Тошкентга кўчиб кетган.
