Хусусан, юнусободлик фаоллардан бири оиладаги ажримларнинг сонини камайтириш учун оила қурилгандан сўнг дастлабки йилларда ажрашганларга қонуний чора кўрилиши кераклигини айтди. Шунингдек, фаол ТВдаги дастурларга ҳам тўхталиб ўтди. У давлат раҳбарига қизлар ўзларини йигитларга тавсия қилиши кўрсатиладиган дастурни тўхтатиш таклифини берди.
“Албатта, сизни тўғри тушуняпман, фарзандларимиз келажагини ўйлаб шу таклифларни айтяпсиз. Аммо ажримларни қонун йўли билан тўхтатишга уринсак, инсон ҳуқуқлари масаласи ўртага чиқади. Енгил-елпи теледастурларга келсак, уларни тўхтатиб ташлаш мумкин, лекин бу цензура дея баҳоланмайдими? Унинг ўрнига қандай кўрсатув яратилади? Нафақат нодавлат, балки давлат телеканалларида ҳам савиясиз дастурларга кўзим тушади. Биз уларни бутунлай тўхтатиш ҳақида эмас, савиясини ошириш ҳақида ўйлашимиз лозим”, – деди Шавкат Мирзиёев.
Таъкидлаш жоиз, сўнгги вақтларда тармоқларда ЗўрТВ телеканлида эфирга узатилаётган “Ёр-ёр” кўрсатуви кўплаб танқидларга сабаб бўлмоқда. Унда уйланиш истагида бўлган йигитлар кўрсатув “қаҳрамони” бўлади ва унга бир нечта номзодлар таклиф этилади. Кўрсатув сўнггида дастур қаҳрамони номзодлардан бирини танлайди ёки ҳеч кимни танламаслиги ҳам мумкин. Шундай кўрсатув Россияда ҳам мавжуд бўлиб, “Давай поженимся” дастури “Первый” телеканалида эфирга узатилади.
