Давлат статистика қўмитаси томонидан Ўзбекистонда 2020 йилда неча киши вафот этгани маълум қилинди. Бу ҳақда EVERYDAY.UZ мухбири хабар қилди.
Маълум бўлишича, ўтган йили мамлакатимизда 175,6 минг киши вафот этган. 2019 йилда ушбу кўрсаткич 154,6 минг кишини ташкил қилган. 2020 йилда қайд этилган ўлим ҳолатининг 60,0 % и - қон айланиш тизими касалликларидан, 8,0 % и – ўсимталардан, 7,2 % и - нафас олиш аъзолари касалликларидан, 4,4 % и - овқат ҳазм қилиш аъзолари касалликларидан, 4,4 % и - бахтсиз ҳодиса, заҳарланиш ва жароҳатланишлардан, 4,4 % и - юқумли ва паразитар касалликлардан ҳамда 11,6 % и - бошқа касалликлардан вафот этган.
2020 йилда энг кўп ўлим ҳолати Тошкент шаҳри – (21,2 минг киши), Фарғона вилояти – (18,5 минг киши), Тошкент вилояти – (18,4 минг киши) ва Самарқанд вилоятида – (18,4 минг киши) қайд этилган. Бу бўйича энг паст кўрсаткич Сирдарё – (4 минг киши), Навоий – (5 минг киши) ва Жиззах вилоятларида (6 минг киши) кузатилган. Таъкидлаш жоиз, ўтган йили мамлакатимизда 841,8 минг нафар чақалоқ дунёга келган ва туғилиш ҳолати 2019 йилга нисбатан (815 минг нафар) кўпроқ бўлгани маълум қилинди.
