Ижтимоий тармоқларда Наманган вилоятидаги мактаб филиалида олинган видео тарқалди. Видео телеграм каналларда эълон қилинди.
Видеода болалар аянчли шароитда таҳсил олаётганини кўриш мумкин. Бино ўқув даргоҳига эмас, балки кўпроқ омбор ёки молхонага ўхшаб кетади. Болалар иккита хонада таълим олмоқда. Битта хонанинг ўзида иккита синфга дарс ўтилмоқда. Ўқитувчилар битта доскани иккига бўлиб олишларига тўғри келяпти ва иккита синф учун бир вақтнинг ўзида дарс ўтишга мажбур бўлишяпти.
Мавжуд маълумотларга кўра, бундай ҳолат Чортоқ туманидаги 39-сонли мактабнинг Булоқбоши филиалида содир бўлмоқда. Мактаб филиалида ҳатто эшиги ҳам йўқ бўлган битта ҳожатхона бор. Шунингдек, болаларга қўлини ювишга ҳам шароит йўқ. Ўқувчилар совуқ бўлгани учун дарсда қалин кийимда ўтиришларига мажбур бўлишмоқда. Ушбу филиалда Бештоп ва Қумробод маҳаллаларида яшовчи болалар ўқишмоқда. Маҳаллий раҳбарлар янги мактаб қўриб беришни ваъда қилиб келишяпти. Лекин аҳоли кўп йиллардан бери ушбу муаммо ҳал бўлмагани учун ваъдаларга ишонмай қўйган.
