Тошкент вилояти Паркент туманида қарийб 200 туп кўп йиллик манзарали дарахтлар ноқонуний равишда кесиб ташланди.
Бу ҳақда ЎзА вилоят экология ва атроф-муҳитни муҳофаза қилиш бошқармаси ахборотига таяниб маълум қилди. Маълумотда қайд этилишича, бошқарманинг экоинспекция бўлимига Паркент туманининг “Қўшчинор“ истироҳат боғидаги кўплаб манзарали дарахтлар кесилаётгани тўғрисида мурожаат келиб тушган. Мазкур мурожаатга асосан олиб борилган ўрганишларда боғ ҳудудидан 280 тупга яқин қайрағоч, акация, арча, айлант каби кўп йиллик манзарали дарахтлар таг қисмидан кесиб ташлангани аниқланган.
Мазкур боғ ҳудудида болалар ва ўсмирлар спорт комплекси қурилиши режалаштирилган бўлиб, қурилиш ҳудудидаги дарахтларни кесиш бўйича туман ҳокимининг қарори қабул қилинган. Эътиборли жиҳати, қарорда 82 туп дарахт кесилиши белгиланган. Аммо айрим уддабуронлар мазкур қарор ижросига қўшимча равишда яна 196 туп дарахтни таг қисми билан кесиб олган.
Бошқарма мутахассисларининг қайд этишича, ўзбошимчалик билан кесилган дарахтлар сабаб табиатга 230 миллион сўмга яқин миқдорда зарар етказилган.
