Ўзбекистонда коронавирусга қарши курашиш бўйича Республика махсус комиссияси янги қарор қабул қилди. Бу ҳақда EVERYDAY.UZ мухбири хабар қилди.
Маълум бўлишича, Афғонистондаги эпидемиологик вазият кескинлашаётганлиги сабабли ўзбек-афғон чегараси вақтинча ёпилган. Таъкидланишича, афғонистонлик фуқароларга туристик визалар бериш ва туристик фирмалардан виза талабномаларини қабул қилиш вақтинча тўхтатилади.
Комиссияининг маълум қилишича, ушбу чеклов вақтида қуйидаги фуқароларгина чегарадан ўта олади:
-дипломатик ваколатхоналар, консуллик муассасалар ва халқаро ташкилотлар ходимлари ва уларнинг оила аъзолари;
-халқаро юк ташиш билан шуғулланувчи ҳайдовчилар;
-ўз юртига қайтаётган Ўзбекистон ва Афғонистон фуқаролари.
Шу билан бирга, чегарада коронавирусга экспресс тест топшириб, манфий натижа чиққанлар Ўзбекистонга киритилади. Агар ўзбекистонлик фуқарода тест натижаси мусбат чиқса у махсус клиникаларга даволаш учун юборилади. Агар афғонистонлик фуқарода мусбат натижа бўлса у мамлакатимиз ҳудудига киритилмайди.
