Хабарингиз бор шу йил 20 июнь санасидан бошлаб абитуриентлар ОТМга кириш учун ҳужжатларни топширишни бошлади. Айни шу сабабга кўра эндиликда имтиҳонлар қандай тарзда ташкиллаштирилиши юзасидан саволлар туғилмоқда.
ДТМ раҳбари Мажид Каримовнинг таъкидлашича, бу йил ОТМга ҳужжат топширувчилар сони 1,6 млндан ортиқ бўлиши мумкин. Шу сабабга кўра имтиҳонларни 20 кунда якунлаш режалаштирилмоқда.
Унинг сўзларига кўра, айни вақтда имтиҳонни ташкиллаштириш учун 2 та сценарий бўйича ишлар олиб борилмоқда. Агар эпидемиологик вазият яхши бўлиб турса имтиҳонлар ёпиқ биноларда ўтказилади. Бунинг учун 96 та бино тайёрланган бўлиб, у ерда бир сменада 47 мингдан зиёд абитуриент имтиҳон топшириши мумкин. Шунингдек, имтиҳонларни очиқ ҳавода ташкиллаштириш бўйича ҳам ишлар олиб борилаётгани таъкидланган. Агар шунга қарор қилинадиган бўлса 63 та стадион ва 2 та ҳиёбон тайёр тургани, у ерларда бир сменада 60 мингдан зиёд абитуриент имтиҳон топшириши мумкинлиги маълум қилинди.