Хабарингиз бор Мусулмонлар идораси бу йил Ўзбекистонда Қурбон Ҳайити 20 июлга тўғри келишини маълум қилган эди. Дастлаб бу йилги Ҳайит намози масжидларда ўқилиши хабар қилинган эди.
Маълум қилинишича, Ўзбекистон мусулмонлари идораси Уламолар кенгаши ийд намози адо этилмаслиги бўйича фатво берган. Таъкидланишича, унинг ўрнига уйда Зуҳо намозини ўқиш тавсия этилган.
Шунингдек, вақтинча Жума намози ҳам ўқилмайди. Маълум бўлишича, масжидларда бошқа намозлар карантин қоидаларига қатъий риоя қилинган ҳолда, масжидларнинг очиқ саҳнларида адо этилади. Масжидларда қўл бериб ёки қучоқлашиб кўришиш қатъиян тақиқланади.
Мусулмонлар идораси жаноза намозлари юзасидан ҳам ўз тавсияларини берган. Унга кўра, жаноза намозлари вафот этганнинг яқин қариндошлари иштирокида, хонадонларда ўқилиши бўйича тавсия берилган. Шунингдек, фотиҳагарчиликларга боришдан ҳамда ўтганларнинг қабрларини зиёрат қилишдан сақланиб туриш тавсияси ҳам берилган.
