Оҳангарон шаҳрида Тошкент вилояти ҳокими Ғ.Ибрагимовнинг сайёр қабули ўтказилди. Бу ҳақда ЎзА хабар қилди.
Қабулда 80 га яқин фуқаронинг мурожаати тингланиб, аксарияти шу жойнинг ўзида ижобий ҳал этилди. Хусусан, Оҳангарон туманида истиқомат қилувчи Феруза Нишонова учун бу кун бир умрга унутилмас бўлиб қолди. Боиси, 2 нафар фарзанди билан ёлғиз, боз устига жисмоний имконияти чекланган ҳолда ижарама-ижара сарсон бўлиб юрган бу аёлнинг мурожаатини тинглаган вилоят ҳокими Ф.Нишоновани уй-жой билан таъминлаш бўйича масъулларга топшириқ берди.
– Сайёр қабулдаги воқеалар ривожи худдики ширин бир тушга ўхшайди, – дейди Ф.Нишонова. – Турмушим ўхшамади, 2 нафар фарзандим билан ёлғиз қолдим. Ота-онам оламдан ўтиб кетгани боис ижарада яшашга тўғри келди. Буниси ҳам етмагандек, 2016 йилда автоҳалокат туфайли тўшакка михланиб 2-гуруҳ ногирони бўлиб қолдим. Катта ўғлим 15, кичиги 12 ёшда. Шу ҳолимда топган-тутганим уйнинг ижара ҳақи ва рўзғор ташвишларига бир амал бўлади. Қабулда вилоятимиз ҳокимига шуларни айтиб, ёрдам сўрадим. У киши менга зудлик билан уй-жой ажратиш бўйича топшириқ берди. Бу ёғи боя айтганимдек, ширин тушга ўхшарди. Лекин, воқеалар туш эмас, реал ҳаётда кечаётган эди.
Мазкур мурожаатга масъул этиб белгиланган Оҳангарон тумани ҳокимлиги томонидан шу жойнинг ўзида Ф.Нишоновага 2 хонали уй берилди.
