— Ўтган йили ёз ойларида фермер хўжаликлари, томорқа эгаларини суғориш билан боғлиқ муаммолар қийнади. Кўпинча энг зарур пайтда ариқларимиз қуриб қолди. Кейинги йилларда шу ҳолат тез-тез такрорланяпти. Муаммонинг сабаблари нимада, уни ҳал этиш учун қандай ишлар амалга ошириляпти? Бу йил ҳам суғориш масаласида қийналамизми?
Ушбу саволларга Сув хўжалиги вазирлиги мутахассиси Рустамжон Қаршиев жавоб берди.
— Бутун дунёда кузатилаётганидек минтақамизда, жумладан, мамлакатимизда ҳам сув ресурсларига бўлган талаб ортаётир, — дейди Рустамжон Қаршиев. — Сувнинг тақчиллиги ҳам шунга мувофиқ йилдан-йилга кучаймоқда. 2000 йилгача кам сувли мавсум ҳар 6-8 йилда бир марта кузатилган бўлса, охирги йилларда бу жараён ҳар 3-4 йилда такрорланяпти. Бугунги кунда 2019 йил учун умумий ҳисоб-китоблар, зарур суғориш сув прогнозлари ишлаб чиқилган. Сув омборларига сув жамғариш, канал ва ариқларни тозалаш ишлари якунланган. Аммо сув ресурсларимиз ҳисобсиз эмас. Бундай шароитда мамлакатимизда сел мавсумларида сувни йиғиб олиш учун сув омборлари тармоқларини барпо этиш ҳамда тежамкор суғориш технологияларидан фойдаланишни кучайтириш лозим. Айни пайтда соҳага доир қатор лойиҳалар ҳаётга татбиқ этила бошланди. Мисол учун, Президентимиз қишлоқ хўжалиги ходимлари куни муносабати билан соҳа вакилларига йўллаган табригида юртимизда яқин йилларда яна 7 та сув омбори барпо этилишини таъкидлаб ўтди. Мазкур омборларда қўшимча равишда 45 миллион куб метр сув йиғиш имконияти пайдо бўлади. Бундан ташқари, келгуси икки йилда 1 миллион 200 минг гектар ернинг сув таъминоти барқарорлаштирилиши натижасида 1 миллиард 700 миллион куб метр сувнинг тежалиши режалаштирилган. Бунда тежамкор суғориш технологияларидан кенг фойдаланиш назарда тутилмоқда. Тежамкор технологиялар, жумладан, томчилаб суғориш услублари бўйича қатор лойиҳалар ишлаб чиқилган. Жорий йилда эса 130 та пахта етиштириладиган туманларнинг ҳар бирида 10 гектардан, жами бир минг уч юз гектар майдонда томчилаб суғориш услублари жорий этилади.
