Телеграмдаги "Daryo-Live" каналида ана шундай сарлавҳа остида мақола эълон қилинди. Қуйида каналдаги постни тўлиқ ҳавола этамиз:
EurasiaNet нашри мухбири Петер Леонард яна ўзбек таксистлари ҳақида ёзибди. Аниқроғи, аэропортдаги «шилқим, ёпишқоқ таксистлар» ҳақида.
«Агар Тошкент сайёҳларда биринчи ижобий таассуротни қолдирмоқчи бўлса, уларни Ўзбекистонга келишлари биланоқ ўраб оладиган, жуда безор қилиб ташлайдиган лицензиясиз киракашлар билан муросаи мадора қилишга мажбур қилмаслик керак», — деган у. Тошкент аэропортидан чиқишдаги шилқим таксистлар муаммосини бир неча кун аввал журналист Никита Макаренко ҳам «Газета.уз»да эълон қилинган «Дарвоза олдидаги шармандалик» сарлавҳали мақоласида кўтариб чиққан эди.
«Мен аэропортдаги шилқим таксичиларнинг сурбетлигига бундан буён ҳам тоқат қилиш учун бирорта ҳам сабаб кўрмаяпман. Келинг, бир ҳисоблаб кўрайлик. Улар 30 киши. Айтайлик, уларнинг ҳар бири кунига бир нечта сайёҳни чув тушириб, 50−60 доллардан ишлаб топишади. Боринг, ана 100 доллар бўла қолсин. Бу эса, нари борса, кунига 3000 долларга тўғри келади. Хўш, мамлакатимиз ёмонотлиқ бўлиш натижасида кўраётган зарар қанча? Мамлакатимизга келмаган барча сайёҳлар бизга қанчага тушяпти? Юз минглаб долларми? Миллионларми? Ҳисобига етиш ўта мушкул. Ундан кўра, муаммодан юз ўгирмасдан, уни ҳал қилган осонроқ», — деб ёзганди Макаренко.
Президент Шавкат Мирзиёев 2018 йил 22 февралдаёқ аэропортда тартиб ўрнатиб, таксичилар масаласини ҳал қилиш ҳақида топшириқ берган эди. Ўшандан буён бир йилдан зиёд вақт ўтди. Ҳеч нима ўзгармади, - дея қўшимча қилинган.
