Тошкентда ўз фарзандини сотмоқчи бўлган қиз ва унинг онаси ҳамда яна бир эркакка ҳукм ўқилди. Бу ҳақда EVERYDAY.UZ мухбири хабар қилди.
Маълум бўлишича, асли фарғоналик қиз танишидан ҳомиладор бўлиб қолган. Сўнгра қиз фарзандни аборт қилдирмоқчи бўлган. Лекин ҳомила вақти узайиб кетгани учун у бундай қила олмаган. Шу сабабга кўра қиз яқинларини шарманда қилмаслик учун фарзанд туғилиши билан сотишга қарор қилган. У ушбу мақсади ҳақида таниш йигитига айтган ва у ҳам қизга “мижоз” топишга киришиб кетган. Маълум бўлишича, ушбу ишга қизнинг онаси ҳам аралашган. Она фарзандни 3 минг долларга баҳолаган. Лекин кейинчалик уни 8500 долларга сотишга қарор қилишган.
Таъкидланишича, учовлон фарзандни 8000 долларга сотаётган вақтда ушланган. Ушбу иш юзасидан бўлиб ўтган судда йигитга 5,5 йил, аёлларга эса 3,5 йил озодликдан маҳрум қилиш жазоси тайинланган.
