Деновдаги портлаш бўйича теракт версияси рад этилди. Бу ҳақда Сурхондарёда бўлиб ўтган брифингда маълум қилинган.
Бош прокуратура бошқарма бошлиғи ўринбосари Дониёр Масалиев ҳодиса портлатувчи модда ёки нефть маҳсулотларининг ёрдамида амалга оширилмаганини маълум қилди. Унинг сўзларига кўра, портлашга бир неча соат давомида сизиб чиққан газ оқибатида тўпланган катта миқдордаги газ ҳаво билан реакцияга киришгани сабаб бўлган.
Бош прокуратура матбуот хизматининг маълумот беришича, портлаш юзасидан ЖКнинг 257 (Меҳнатни муҳофаза қилиш қоидаларини бузиш) ва 259 (Ёнғин хавфсизлиги қоидаларини бузиш) моддалари билан жиноят иши қўзғатилган. Тергов ҳаракатлари олиб борилмоқда.
