Маълум бўлишича, Судьялар олий кенгаши йиғилишида уч нафар номзод илк марта ушбу лавозимга тайинланган. Хусусан, Сойибжон Абдусамадович Раҳимов Наманган туманлараро маъмурий судининг судьяси, Ғайратали Уматалиевич Дарвишалиев Андижон туманлараро судининг судьяси ва Адилбек Джолдасович Сейтназаров Гулистон туманлараро судининг судьяси лавозимига тайинланган.
Шу билан бирга, Сурхондарё вилояти фуқаролик ишлари бўйича Шеробод туманлараро судининг раиси лавозимида ишлаб келган Жасур Ибодуллаевич Ибодуллаев судьялик қасамёдини бузгани учун ёзма аризасига асосан ишдан олинган. Шунингдек, Бухоро вилоят маъмурий судининг судьяси Жамол Ражабович Шарипов ҳам ўз аризасига кўра ишдан кетган.
Маълумот ўрнида, “Судлар тўғрисида”ги Қонуннинг 60-моддасига кўра, илк бор судьялик лавозимига сайланган ёки тайинланган шахс қуйидаги мазмунда қасамёд қилади:
«Зиммамга юклатилган вазифаларни ҳалол ва виждонан бажаришга, одил судловни фақат қонунга бўйсунган ҳолда амалга оширишга, судьялик бурчим ва виждоним буюрганидек беғараз, холис ва адолатли бўлишга тантанали қасамёд қиламан».
