Ўзбекистон раҳбари кеча, 7 февраль куни қурилиш лойиҳалари тақдимоти билан танишди. Бу ҳақда Президент матбуот хизмати хабар қилди.
Шавкат Мирзиёевга шундай лойиҳалар қаторида Тошкент вилоятининг Бўстонлиқ туманида ташкил этилаётган “Чорвоқ” туристик-рекреацион зонаси лойиҳаси ҳам тақдим этилди. Унга кўра, Чорвоқ сув омбори ва Чирчиқ дарёси ҳудудида экотуризм объектлари қурилиши таъкидланди. Бунинг учун аввало қулай транспорт тизими йўлга қўйилади. “Чорвоқ дарвозаси” ва “Юсуфхона” ҳудудларида дам олиш жойлари, Жанубий Хўжакентда анъанавий тоғ қишлоғи барпо этилади. Ҳудуднинг хушманзара табиати ва рельефини сақлаб қолишга алоҳида эътибор қаратилади. Боғлар, пикник жойлари, велосипед йўлаклари ташкил қилинади. Шундай лойиҳа Чимён ҳудудида ҳам режалаштирилган.
Давлатимиз раҳбари бу мажмуалар оммабоп бўлиши зарурлигини таъкидлаб, барча юртдошларимиз, турли касб эгаларига мос арзон ва қулай хизматлар таклиф этиш вазифасини қўйди.
