Навоийда ҳайдовчи ЙПХ ходимига 100 доллар пора таклиф қилаётганда ҳуқуқ тартибот органлари ходимларини кўриб уни ютиб юборди. Бу ҳақда вилоят ИИБ матбуот хизмати хабар берди.
ЙПХ инспектори “Нексия-1” русумли автомашинани Қарнаб-Навоий йўналиши бўйича кетаётганда ҳайдовчи хавфсизлик камарини тақмаганлиги сабабли тўхтатган. Ҳужжатларни текширганда, эркак давлат рақамини ўзгартиргани маълум бўлди. ЙПХ ходими ҳужжатларни тўлдириб, машинани жарима майдончасига олиб борди. Бироқ ҳайдовчи унга машинани қайтариб бериш учун 1 миллион сўм пора таклиф қилган.
Фуқаро, ходимнинг пора бериш қонуний жавобгарликка олиб келиши ҳақида бир неча бор огоҳлантиришларига қарамай пул таклиф қилиб, туриб олган.
Эртаси куни ҳайдовчи ЙПХ инспектори билан учрашиб, унга 100 доллар бермоқчи бўлган. Шу пайт ҳуқуқ-тартибот идоралари ходимлари вазиятни ўрганиш мақсадида бинога киришган. Уларни кўрган ҳайдовчи қўрқиб кетган ва пулни ютиб юборган.
Тиббиёт ходимлари ҳайдовчини эндоскопия қилиб, унинг ошқозонидан 100 долларни олиб ташлашган.
Мазкур ҳолат юзасидан Жиноят кодексининг 211-моддаси 1-қисми (пора бериш) билан жиноят иши қўзғатилган.
