Амалий ишлар даври
Самарқанд давлат университети ректори, профессор, Олий Мажлис Сенати аъзоси Рустам Холмуродовнинг талабалар билан учрашувида филология факультети талабаси Ноила Файзуллаева қизлар учун тикув хоналари ташкил этиш ҳақидаги таклифни илгари сурганди. Мазкур ташаббус ректор томонидан ижобий қабул қилинди.
Бугун 5-сонли талабалар турар жойида ана шундай тикувчилик хоналаридан бири очилди. Ушбу тикувчилик хонаси талаба қизлар учун қўшимча даромад топиш учун яна бир имкониятдир. Шунингдек, улар ўзлари учун керакли тикиш ишларини ҳам шу ерда бажаришади.
СамДУ хотин-қизлар масалалари бўйича маслаҳат кенгаши раиси, ректор маслаҳатчиси Шарофат Тўхлиева талаба-қизларга бошлаётган янги ишларида омад ва зафарлар тилади. Мазкур тикувчилик хонаси 5 дона тикув машинаси билан жиҳозланган бўлиб, унда 10 дан ортиқ талаба қиз ўриндошлик асосида фаолият юритади. Тикувчилик хоналарида дастлаб, ётоқхоналар учун чойшаблар тикиш йўлга қўйилади, кейинчалик қўшимча буюртмалар орқали унинг фаолияти кенгайтирилиши режалаштирилган.
– Бир неча кун аввал, бўлиб ўтган ректор ва ёшлар учрашувида талаба қизлар учун тикув хоналари очиш таклифи билан ректоримизга мурожаат қилган эдим, - дейди филология факультети талабаси Ноила Файзуллаева. - Мана, қисқа фурсат ичида унинг амалдаги ифодасини кўриб турибман. Шунингдек, бу ерда тикувчиликни ўрганмоқчи бўлган қизлар учун алоҳида тўгарак ҳам ташкил этилади. Бизнинг таклиф ва ғояларимизни тинглаб, қўллаб-қувватлаётган ректоримизга раҳмат.
Ирода Бекмуродова,
Самарқанд давлат университети
Ахборот хизмати ходими.
Шавкат Акрамов олган суратлар.
