Тошкентдаги “Атлас” савдо марказида маиший техникага чегирмалар эълон қилингани ҳақида аввал хабар берган эдик. 70% чегирма туфайли кўплаб фуқаролар савдо марказига боришди.
Тошкент шаҳар ички ишлар бош бошқармасининг маълум қилишича, савдо марказига бугун, 23 апрел куни 18 мингдан ортиқ одам келган. Барча фуқароларни марказ ичига киритишнинг имкони бўлмаган ва кўпчилик дўконга бормасдан чиқиб кетди.
Ичкарига киришга муваффақ бўлганлар ҳам ҳафсаласи пир бўлган. Ижтимоий тармоқларда фуқаролар алданганликларини билдираётган видеолар тарқалмоқда. Марказга ташриф буюрганларнинг таъкидлашича, жиҳозлар нархи бошқа савдо нуқталари билан деярли бир хил. Эслатиб ўтамиз, аввалроқ ҳайдовчилар катта тирбандлик туфайли савдо маркази жойлашган Чилонзор туманидан чиқа олмаган эди.
