2021 йилда Ўзбекистонда аёлларга нисбатан зўравонлик ҳолатлари бўйича 39 343 та мурожаат тушган. Бу ҳақда АОКАда аёллар масалаларига бағишланган матбуот анжуманида маълум бўлди.
Ҳар бир мурожаат юзасидан ҳуқуқ-тартибот идоралари томонидан ҳимоя ордерлари чиқарилган. Уларнинг қарийб 400 нафарини вояга етмаган қизлар, 30 мингдан ортиғини 30 ва ундан катта ёшдаги аёллар қабул қилган.
Маълум бўлишича, мурожаатлар умумий сонининг 87 фоизи оилавий зўравонликка тўғри келади. 100 дан ортиқ жинсий зўравонлик ҳолатлари аниқланган. Уларнинг аксарияти психологик (18 777) ва жисмоний зўравонлик (13 658). Яна 7174 та ҳолатда безорилик қайд этилган.
300 дан ортиқ оғир руҳий ҳолатдаги аёллар реабилитация марказларига жойлаштирилган. 500 нафардан ортиқ қиз таълим муассасаларига бириктирилган. Шунингдек, 26 667 нафар турмуш ўртоғи учун, "бошқа шахслар" учун эса 10 мингга яқин ҳимоя ордерлари берилган.
Шунингдек, зўравонликлар оқибатида 921 оила парчалангани маълум қилинган. 20 000 дан ортиқ оилани яраштиришга муваффақ бўлинган.
