Видеотакрорлар технологияси билан шуғулланувчи “Hawk-Eye Innovations Ltd” компанияси Ўзбекистонга ҳам ушбу тизимни олиб кириши мумкин. Компаниянинг Осиё минтақаси бўлими бошқарувчи директори Бен Кроссинг 19 ноябрь куни Ўзбекистон Миллий олимпия қўмитаси президенти Умид Аҳмаджонов билан учрашув вақтида шу масала бўйича музокара ўтказди.
“VAR тизимини ўрнатиш учун 4-8 ой вақт кетади. Унинг нархи келишув шартларига боғлиқ. Масалан, бунинг учун маҳаллий компанияларни жалб қилсангиз, бу сиз учун арзонроқ тушади. Агар беш йиллик келишув амалга оширилса, янада яхшироқ шароитлар яратилади”, дея Кроссингнинг сўзларини келтиради ЎФА расмий сайти.
Шунингдек, мутахассис Ўзбекистондаги стадионлардан бирини кўздан кечиришни режалаштираётганини билдирган. Айнан қайси стадион экани эса ҳали белгиланмаган.
Ҳозирча тизим қачон ва қайси стадиондан бошлаб ўрнатилиши борасида аниқ маълумотлар берилмаган.
