Ўзбекистон халқи Туркия халқи билан бирга...

Анқара Йилдирим Боязид университети ректори,
қадрли дўстим Иброҳим Айдинли жанобларига!

Самарқанд давлат университети жамоаси ва ўз номимдан қардош турк халқига чуқур ҳамдардлик билдираман. Бошингизга тушган синовлар ва талафотлардан қайғудамиз, табиий офат натижасида жабр кўрганларга сабр-матонат тилаймиз. Ҳалок бўлганларни Аллоҳ раҳматига олсин.

Халқларимиз ўртасидаги қондошлик ва қардошлик бугунги оғир кунларда синовдан ўтмоқда.

Ўзбекистон Республикаси Президенти Шавкат Мирзиёев Туркия Республикаси Президенти Режеп Таййип Эрдоған билан телефон орқали мулоқот қилиб, чуқур ҳамдардлик билдирди.

Ўзбекистон Президентининг топшириғига кўра, кучли зилзиладан жабр кўрганларга гуманитар ёрдам кўрсатиш ҳамда табиий офат оқибатларини бартараф қилишда иштирок этиш учун Фавқулодда вазиятлар вазирлигининг бир гуруҳ қутқарувчилари юборилди.

Самарқанд давлат университети номидан Туркиянинг Самарқанддаги бош консулхонасида бўлиб, Бош консул Салиҳ Жанер билан учрашдик. Туркия халқига, табиий офат сабаб вафот этганларнинг оилалари ва яқинларига чуқур таъзия билдирилди.

Сизга ва Сиз орқали бутун Туркия халқига омонлик, сиҳат-саломатлик ва хотиржамлик, метин ирода ва ҳамжиҳатлик тилайман.

Сизларни Аллоҳ паноҳида асрасин. Синовли кунларни сабр-тоқат билан енгиб ўтишингизга ишонаман.

Ўзбек халқи ҳамиша турк халқи билан бирга...