Франциянинг турли ҳудудларида ҳайдовчиларнинг оммавий норозилик намойишлари бўлиб ўтди – улар бензин нархи оширилишидан норози. Нур қайтаргичли сариқ нимчаларни кийиб олган намойишчилар йўлларни ёпиб қўйган, намойишларда 50 мингга яқин одам қатнашган. Афсуски, тинч намойишлар вақтида ҳам қурбон бўлганлар йўқ эмас.
Франция ҳукумати 2019 йилдан дизель ёнилғисига солинадиган солиқни 6,5 фоизга, бензинга солинадиган солиқни эса 2,9 фоизга оширмоқчи. Бу чоралар, франциялик амалдорларнинг фикрича, ё французларни шахсий автомобиллардан воз кечиб жамоат транспортига ўтишга мажбур қилади, ё электрокарлар сотиб олишга ундайди. Ҳар икки ҳолатда ҳам атроф-муҳитга фойда, дейишяпти.
