2018 йилнинг 11 ойи мобайнида Қирғизистон ялпи ички маҳсулоти ҳажми 3,1 фоиз ошди ва 474,5 млрд сомни (6,8 млрд доллар) ташкил этди.
Мамлакат иқтисодининг ўсишига саноат ва аграр соҳада ишлаб чиқариладиган маҳсулот ҳажмининг ошиши сабаб бўлган.
Қирғизистонда январь-ноябрь ойларида чиқарилган умумий саноат маҳсулотлари ҳажми 221,1 млрд сомни ташкил этди ва ўтган йилнинг айни шу даврига нисбатан 4,9 фоиз ўсди. Хусусан, мамлакатда фойдали қазилмалар қазиб олиш ҳажми 7,8 фоиз, қимматбаҳо металлар ишлаб чиқариш ҳажми эса 2,2 фоиз ўсган.
Шунингдек, 11 ой мобайнида қишлоқ хўжалиги маҳсулотлари ҳажми 2,4 фоиз, қурилиш маҳсулотлари ҳажми 8,4 фоиз ҳамда улгуржи ва чакана савдо ҳажми 5,1 фоиз ўсган.
Бундан ташқари, жорий йилнинг январь-ноябрь ойларида (ўтган йилнинг декабри билан таққослаганда) республикада истеъмол нархлари 0,2 фоиз камайган ва 2,7 фоизни ташкил этган. 2017 йилнинг айни шу даврида истеъмол секторида инфляция даражаси 2,9 фоизни ташкил этганди.
