Қирғизистон президенти Сооронбай Жээнбеков қандай ҳолатда ишдан кетишга рози бўлишини маълум қилди. Давлат раҳбари мамлакатдаги вазиятдан келиб чиқиб ватандошларига мурожаат қилди. Мурожаат матни президент матбуот хизмати томонидан эълон қилинди.
Жээнбеков ўз мурожаатида мамлакатда сиёсий аҳвол инқирозли ҳолатга келиб қолганини маълум қилди ва вазиятни ўнглаш учун маълум ишларни амалга ошириш кераклигини таъкидлади.
Президент парламентга сайлов натижаси бекор қилинганини, энди МСК янги сайлов бўйича қарор қабул қилиши кераклигини ва ушбу ҳолат мамлакатдаги сиёсий тарангликни юмшатишини билдирди. Шунингдек, шу кунгача ишлаб келган ҳукумат раҳбари ва таркибини тарқатиб юбориш кераклигини айтди. Президент бу бўйича ҳужжатга имзо чекишга тайёр эканини билдириб, Жогорку Кенешнинг қарорини кутаётганини таъкидлади.
Жээнбеков ижро этувчи ҳукуматнинг легитим таркиби шакллантирилгач ва давлат ўзининг қонунийлик йўлини белгилаб олгандан сўнг мамлакат раҳбарлигидан кетишга рози эканини алоҳида таъкидлаган.
“Мен учун давлатнинг ҳудудий яхлитлиги, халқнинг бирлиги ва жамиятнинг тинчлигидан бошқа ҳеч қандай лавозим устун бўла олмайди” – дейди Сооронбай Жээнбеков.
