Россиялик блогер Андижонда содир бўлган “самосуд” видеосини кўргандан сўнг шундай фикрга келган. Аввалроқ EVERYDAY.UZ мухбири хабар қилганидек, ҳодиса Жалақудуқ туманидаги деҳқон бозори ҳудудида содир бўлган эди. Ўшанда бир нечта маҳаллий аҳоли эркакни қоида бузган ҳайдовчиларни суратга олишда айблаб, уни машина юкхонасига солиб қўйган эди.
Блогер Илья Варламов ушбу ҳолатга тўхталиб ўтди ва баҳорда коронавирус билан боғлиқ ҳолат барқарорлашса Ўзбекистонга келмоқчи бўлганини, лекин энди у фикрдан қайтганини билдирди.
“Энди сал қўрқиб қолдим ва Андижонга борганимда мени юкхонага солишларини истамайман. Айтганча, (видеода) ҳужум қилганлардан бири у эркакни дарахтга боғлашни ҳам таклиф қилган эди. Хуллас, агар Ўзбекистонга борсам мени юкхонага солишлари ва кейин дарахтга боғлашлари мумкинлигини ўйлаб, ҳавотир оляпман , – дейди блогер.
Шу ўринда Варламов қоидабузарларни суратга олиб бу учун ҳақ тўланишини яхши ғоя деб атади. Блогер унинг мамлакатида ҳам ушбу тизим ишлашидан умидвор эканини билдирган.
