ДХХ ва ички ишлар ходимлари ҳамкорлигида олиб борилган тезкор тадбир давомида Ўзбекистонда 18 нафар фуқародан иборат жиноий гуруҳ фош этилди. Улар психотроп дори воситалари савдоси билан шуғулланган.
Маълум бўлишича, гуруҳ таркибини асосан Тошкент шаҳри, Фарғона, Наманган ва Самарканд вилоятларида яшовчи фуқаролар ташкил этади. Гуруҳда 43-26 ёшлар оралиғидаги шахслар бор. Эътиборли жиҳати, улар орасида аёллар ва судланганлар ҳам фаолият юритган. Тезкор тадбир давомида ушбу гуруҳдан умумий қиймати 3,2 млрд. сўмдан зиёд бўлган 28.560 дона “Трамадол” таблеткаси, 7000 дона “Тропикамид” флакони, 35.700 дона “Лирика”, 3.920 дона “Регапен” ва 5.600 дона “Перге” капсулалари мусодара қилинган. Шу билан бирга, улардан 4.300 доллар процессуал тарзда расмийлаштириб олинган. Бундан ташқари, улардан жиноят қуроли сифатида 1 та “Малибу”, 3 та “Ласетти” ва 1 та “Нексия” автомашиналари олиб қўйилган.
Ушбу гуруҳ дори воситаларини контрабанда йўли билан асосан Қирғизистон Республикасидан олиб келган.
Ҳозирда ушбу ҳолат юзасидан ЖКнинг тегишли моддалари билан жиноий иш қўзғатилган ва ҳозирда тергов ҳаракатлари олиб борилмоқда.
