Навоийда эркакнинг бўйнига арқон боғлаб, қийноққа солиб, дарахтга боғлаб кетганларга жиноий иш қўзғатилди. Бу ҳақда ҳуқуқни муҳофаза қилувчи органлар томонидан хабар қилинди.
Маълум бўлишича, шу йил 3 октябрь куни 32 ёшли эркак ўзи фаолият юритувчи фермер хўжалигига раҳбарлик қилувчи, 26 ёшли Ж.Н.ни маст ҳолатда ҳақоратлаб ташлаган. Шундан сўнг ёш раҳбар ишчисини уриб, бўйнига арқон солиб, танишининг трактор тиркамасида бошқа жойга олиб борган. У ерда йигит ишчисини қийноққа солиб, дарахтга боғлаб кетган. Ж.Н. ушбу воқеанинг барчасини телефонига ёзиб олган ва уни танишига телеграмдан жўнатган. У эса видеонинг бутун Ўзбекистонга ёйилишига сабабчи бўлган.
Қўшимча қилинишича, 32 ёшли эркак эртасига раҳбарининг уйига бориб, ўзи аслида нима бўлганини билмоқчи бўлганида йигитнинг отаси уйига олиб кириб, уни уриб ташлаган.
Ҳолат юзасидан ЖКнинг 109-моддаси 2-қисми (Қасддан баданга енгил шикаст етказиш) ва 138-моддаси 1-қисми (Зўрлик ишлатиб ғайриқонуний равишда озодликдан маҳрум қилиш) билан жиноят иши қўзғатилган. Суриштирув ҳаракатлари амалга оширилмоқда.
