Тошкентда танишига каратэ трюкини кўрсатган аёл пичоқлаб ўлдирилди. Бу ҳақда Тергов департаменти хабар қилди.
Маълум бўлишича, 2020 йил 23 декабрь соат 09:03 да Яшнобод тумани Сандиқли 1-тор кўчаси 2-уй олдида аёлнинг мурдаси топилган. Унинг танасида тан жароҳатлари аниқланган. Суриштирувлар натижасида у 31 ёшли аёл Д. К. экани маълум бўлган. Аёл 22 декабрь куни танишининг уйида дўстлари билан тиббиёт спиртини ичган. Шунда каратэ билан шуғулланувчи аёл танишига ўша спорт услубларини намойиш этган ва бу вақтда танишларининг бирига тегиб кетган. Бу эса ўша танишига ёқмаган ва шу заҳоти у аёлни пичоқлаган. Каратэчи аёл пичоқдан жароҳатлангач уйдан қочиб чиққан ва юқорида айтилган манзилда қулаб тушган.
Ҳолат юзасидан ЖКнинг 104-моддаси 3-қисми «д» банди (Жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилган. Гумонланувчи В. А. эса ҳибсга олинган.
