Сирдарё вилояти Ширин шаҳрида уч фарзанд улғаяётган оилада қотиллик содир этилди. Бу ҳақда Бош прокуратура ахборот хизмати хабар қилди.
Маълум бўлишича, 63 ёшли эркак шу йил 18 январь куни соат 21:00да шаръий никоҳ асосида яшовчи 50 ёшли хотинига беш марта пичоқ уриб, умрига зомин бўлган. Эркак ҳодисадан 12 соат ўтиб, яъни 19 январь соат 09:00да ИИБга ариза билан мурожаат қилиб, унда хотинини ўлдириб қўйганини ёзган. Эркак аризасида хотини билан “пул топиб келмаяпсиз” деган гапи учун жанжаллашганини ва шундан сўнг уни ўлдирганини баён қилган.
Воқеа жойи кўздан кечирилганда ашёвий далиллар ва қон излари аниқланган. Тиббий экспертиза ҳам аёлнинг пичоқдан ўлганини тасдиқлаган. Эркак ҳибсга олинган, унга нисбатан ЖКнинг 97-моддаси (Қасддан одам ўлдириш) 1-қисми билан жиноят иши қўзғатилган.