Ўзбекистонда фирибгар ер учун 3 млн 720 минг долларни олаётганда ушланди. Маълум бўлишича фирибгар ДХХ ва Бош прокуратура ҳузуридаги Департамент ходимлари томонидан қўлга олинган.
Хабар қилинишича, қибрайлик тадбиркор ер олиб, боғдорчилик ва чорва моллари бизнеси билан шуғулланмоқчи бўлган. Бунинг учун у ҳокимликларга мурожаат қилган. Лекин иши “пишмаган”. Шунда фуқарога ер кераклигидан «Asiyan Milk Best» МЧЖ раҳбари Т.Қ. хабар топган ва қибрайлик тадбиркорга ўз хизматини таклиф қилган. Т.Қ. Қуйичирчиқ туманидаги 360 гектар суғориладиган ерни ва ҳозирда норасмий фойдаланиб келаётган туман заҳирасидаги 100 гектар ерни тадбиркор номига ўтказиб беришини айтиб, ундан 3 млн. 700 минг доллар сўраган. Шунингдек, Қуйичирчиқ тумани хокимлигида ишловчи танишига 20 минг доллар беришини айтиб, у пулни ҳам беришни сўраган.
Тезкор тадбирда Т.Қ. 3 млн 720 минг долларни олаётган вақтда ушланган. Ҳозирда ҳолат юзасидан ЖКнинг 168 ва 211-моддалари билан жиноят иши қўзғатилган, тергов ҳаракатлари олиб борилмоқда.