Тошкентда икки кишига қабр қаздириб, ўша ерга ўзларини кўмиб юбориш билан қўрқитган бир гуруҳ шахсларга ҳукм ўқилди. Бу ҳақда EVERYDAY.UZ мухбири хабар қилди.
Маълум бўлишича, 25 ёшли йигит АЁҚШда ишлайдиган, ўзидан кичик ёшли болага зўравонлик қилиб келган. У ишчидан кунлик ишлаб топётган пулининг бир қисмини беришни, акс ҳолда уни ишдан бўшаттириб юбориш ва ўзи ҳамда онасини калтаклаш билан таҳдид қилган. Шу орқали йигит боладан 4 млн сўм ундирган. Бу ҳам етмагандик, йигит шериклари билан келиб, болани Дўмбирободдаги қабристонга олиб бориб, ўзига қабр кавлатган ва пичоқ билан жароҳат етказган. Бир гуруҳ шахслар болани агар бу ҳақида бировга айтадиган бўлса, бўлган воқеа видеосини тарқатиб юбориш ва ўша ерга кўмиб қўйиш билан таҳдид қилган.
Улар шу билан кифояланмаган. Гуруҳ аъзолари яна бир шахсни қабристонга олиб бориб унга ҳам ҳудди шундай таҳдид ва ҳаракатлар содир этиб, 1,8 млн сўмлик телефонини олиб қўйган.
Ушбу иш юзасидан бўлиб ўтган судда 5 нафар шахсга ҳукм ўқилган. Уларнинг учтасига – 10 йил-у 2 ой, 6 йил ҳамда 5 йил-у 6 ой муддатга озодликдан маҳрум қилиш жазоси, икки нафар вояга етмаганларига 3 йил муддатга озодликни чеклаш жазоси, иккинчисига икки йил синов муддати берилган. Жабрланувчининг ўзи 241-модда (Жиноятни ҳисобга олишдан қасддан яшириш) бўйича судланган.
