Кеча, 16 декабр куни Халқаро матбуот марказида партия вакиллари иштирокида навбатдаги матбуот анжумани бўлиб ўтди. Унда коммунал тўловларни табақалаштириб тўлаш, кам таъминланган оилаларга нафақа пулини бериш борасида сўз борди.
“Табақалаштирилган коммунал тўлови жорий қилиш бу бояги боқимандалик кайфиятини рағбатлантириб қўяди. Ўзим туманда ишлаганман. Бир хиллар айтади, жисмонан кучли, ишласа пул топадиган . Лекин мени кам таъминланганлар рўйхатига киритиб қўйгин дейди. Мен нафақани олишим керак дейди. Эртага биз буниям қиладиган бўлсак ишлайдиган одам ҳам кам таъминланганман деб ўшалар қаторига қўшиб қўясан дейди. Тўполон қилади. Халқимизни шунақа томондан рағбатлантириб қўямиз. Биз ишлашга, меҳнат қилишга ўргатишимиз керак,”, – деди ЎзЛиДеП вакили Бахтиёр Руҳитдинов.
Мунозаралар жараёнида Миллий тикланиш вакили, депутат Нодиржон Мухторов ҳам ўз фикрини билдирди.
“Масалан мен Олий Мажлис депутатиман. 10 миллион ойлик оламан. Қишлоқда мисол учун битта оилада ўқитувчи бор. У 1,2-1,3 млн ойлик олади. 4 та фарзанди, ота-онаси бор, мисол учун. Энди тасаввур қилинг. Менга ҳозир электр энергиянинг нархини оширса, менга таъсир қилмайди. Лекин унга таъсир қилади”, – дейди депутат.
Эслатиб ўтамиз, аввалроқ Миллий тикланиш раҳбари Алишер Қодиров табақалашган коммунал тўлов тизмини таклиф қилган эди.
