Куни кеча Президент Шавкат Мирзиёев ЎзМУда олий таълим ва илмий-тадқиқот муассасалари раҳбарлари, академиклар, ёш тадқиқотчилар билан учрашган эди.
Учрашувда ЎзМУ математика факультети 4-курс талабаси Сардор Бозорбоев математика фанидан республика ва халқаро миқёсидаги ўтказилган олимпиадалардаги мувафаққияти ҳамда ЎзМУ С.Сирожиддинов номидаги академик лицей ўқувчиларини математика фанидан халқаро олимпиадаларга бепул тайёрлаётгани, ўқувчилари Россияда бўлиб ўтган олимпиадаларда муносиб иштирок этгани билан давлатимиз раҳбари эътиборига тушди.
Президент талабанинг иштиёқи, ташаббускорлиги ва Ватан равнақи йўлидаги фидойилиги учун “Ўзавтосаноат” АЖ бошқаруви раиси Шавкат Умирзоқовга Сардор Бозорбоев учун автомобиль ажратиш бўйича кўрсатма берди.
Шундан сўнг ЎзМУ талабасига Президент совғаси – «Кобальт» автомобили топширилди.
- Президентимизнинг кичкина меҳнатимни шуначалик катта эътибор билан тақдирлаши, тўғрисини айтсам, мени жуда ҳам тўлқинлантирди, - дейди Сардор. - Менга билдирилган ишончни оқлашга, бор кучим, ёшлик шижоатим ва билимимни Она халқим ва Ватаним равнақи йўлида сафарбар этишга сўз бераман.
