6 май куни Қўқондаги 8-мактабнинг рўзадор ўқувчилари дарсдан кейин мактаб директори томонидан офтобда югуртирилган. Бу ҳақдаги маълумотни Ўзбекистон Бош прокуратураси тасдиқлади.
Маълум қилинишича, рамазоннинг илк кунида рўй берган ҳолат ўз тасдиғини топгач, мактаб директори Феруза Жаббарова жаримага тортилган.
Жаббарова терговга қадар текшириш давомида бошланғич синф ўқувчиларини спорт майдончасида югуртирганини тан олмаган, аммо ўқувчилар ва уларнинг ота-оналари берган кўрсатмалар бунинг аксини тасдиқлаган.
«Ўзига юклатилган вазифаларни лозим даражада бажармасдан, қонун бузилиши ҳолатига йўл қўйганлиги учун мактаб директори Ф.Джаббаровага нисбатан интизомий жавобгарлик тўғрисида иш қўзғатилиб, Фарғона вилоят Халқ таълими бошқармаси бошлиғининг 22.05.2019 йилдаги 21ж-сонли буйруғи билан ўртача ойлик иш ҳақининг ўттиз фоизи миқдорида “Жарима” интизомий жазо чораси қўлланилган», – дейилади расмий билдиришда.
Қўшимча қилинишича, ушбу ҳолатда директорнинг ҳаракатларида жиноят аломатлари бўлмаганлиги сабабли, 21.05.2019 йилда Қўқон шаҳар прокуратураси томонидан жиноят иши қўзғатишни рад этиш ҳақида қарор қабул қилинган, дея маълум қилади кун.уз.
