Аввалроқ Андижон вилояти Асака шаҳрида аҳоли кўприк устидаги пиёдалар ўтиш йўлакчасидан ҳарактланишда қийинчиликка дуч келаётгани ҳақида ёзган эдик. Маҳаллий блогерлардан бири кўприк устида репортаж тайёрлаб турган вақтда мактаб ўқувчисидан бу бўйича фикр сўради ва ўқувчи ўз навбатида ушбу ҳолатни кескин танқид қилган эди.
Мактаб ўқувчиси кўприкнинг шундай аҳволи сабабли пиёдалар йўлга чиқиб кетаётганини айтган эди. Бундан ташқари, бола яқинда шу ерда пиёдани машина уриб кетганини ҳам айтган.
Кеча, 16 январь куни маҳаллий ҳокимият вакиллари кўприкнинг пиёдалар ўтиш йўлакчасини таъмирлаётгани хабар қилинди. Дарё нашрининг маълумотига кўра, ушбу кўприк бир неча йиллар олдин шу аҳволга келиб қолган. Лекин бунга ҳеч ким эътибор қаратмаган. Энди боланинг мурожаатидан сўнг шу муаммо ҳал бўладиган бўлди.
