Ҳодиса Юнусобод тумани Юнусота кўчасида содир бўлган эди. Кеча тармоқларда ўша ҳодисада вафот этган боланинг акаси Президентга видеомурожаат қилгани ҳақида хабарлар тарқалди. Видеода Амирхон Чеховский ҳодиса содир бўлган жойга светофор ўрнатишни сўраган.
“Бизда жуда кўп аварияар содир бўлмоқда. 2020 йил 24 август куни менинг онам ва укамни маст ички ишлар ходими пиёдалар ўтиш йўлакчасида машинада уриб кетди. Онам тирик қолди, укам эса ўлди. Укам 2,5 ёшда эди. Ўша ГАИ ходимини 5 йилга қамашди. Сиздан светофор ўрнатишни ва қариялар ҳамда болаларнинг умрини сақлаб қолишни сўрайман”, – дейди Амирхон.
Бола мурожаатда унинг ота-онаси ҳодиса жойидаги пиёдалар ўтиш йўлакчаси ва йўл белгиларини янгилаб қўйганини айтди. Амирхон ҳозирда ҳеч ким ёрдам бермаётганини ва светофор ўрнатилмаётганини маълум қилди.
“Бизда жуда кўп коллежлар, боғчалар бор. Маст ГАИ ходимларини, маст ҳолда автомобиль бошқарадиганларни жазоланг. Мени эшитганингиз учун сизга катта раҳмат”, – дейди вафот этган боланинг акаси.
