Аввалроқ “Амирсой” сиҳатгоҳига олиб борувчи йўлда йўл чўкиш ҳолати кузатилгани ҳақида ёзган эдик. Ҳодиса бугун эрталаб содир бўлган.
Ўзрепорт ушбу муаммо билан яқиндан танишиш мақсадида воқеа жойига бориб ўрганди. Аниқлик киритилишича, йўл кўчиш кеча, 24 март кунидан бошлаб кузатилган. Ўшанда йўлнинг фақатгина 20 см масофаси чўккан бўлган. Бугун, 25 март куни соат 6-7лар атрофида чўкиш бирданига 1,5-2 метрга ортиб кетган ва йўл бутулай ёпилган. Мутахассилар ёғингарчилик кўп бўлганини ва йўлнинг остидан булоқ оқиб ўтганини бунга сабаб қилиб кўрсатишмоқда. Шунингдек, бу йўл қурилиши билан боғлиқ муаммо эмаслиги, балки ер кўчиши эканлиги таъкидланди.
Мутахассислар тоғ кўчиши ҳали тугамаганлигини маълум қилди. Ушбу жараён якунлангач таъмирлаш ишлари бошланади. Бу эса 1 ойча вақтни олиши таъкидланди. Ушбу вақт оралиғида йўллар ёпиқ бўлади ва аҳоли у ердан ўта олмайди.
