Жиззах вилоятида мансабдор шахсларга нисбатан жиноий иш қўзғатилди. Бу ҳақда Бизнес-омбудсман хабар қилди.
Маълум бўлишича, Бизнес-омбудсманга бир гуруҳ тадбиркорлардан мурожаат келиб тушган. Улар ўзларига нисбатан ноқонуний равишда қарздорлик ҳисобланганлиги билдириб, асоссиз газдан узилганлигидан норози бўлган. Аниқлик киритилишича, “Ҳудудгаз Жиззах” ходимлари қарийб 903 миллион сўмлик нореал қарздорлик киритишган. Мазкур ҳолат бўйича Бизнес-омбудсман ушбу ташкилот мансабдор шахслари ва бошқаларнинг ҳаракатларига қонуний баҳо бериш ва уларга нисбатан жиноий иш қўзғатиш бўйича вилоят прокуратурасига таклиф юборган.
Таъкидланишича, ушбу таклифдан сўнг ўрганиш олиб борилган ва унинг якунига кўра “Ҳудудгаз Жиззах” газ таъминоти филиали, “Ҳудудгаз Метрология” филиали Жиззах бўлими мансабдор шахслари ва бошқаларга нисбатан ЖКнинг 205-моддаси 2-қисми ва 209-моддаси 1-қисми билан жиноят иши қўзғатилган. Айни вақтда тергов олиб борилмоқда.
