Адлия вазирлиги томонидан ҳайдовчиларга қатор қулайликлар яратилиши мумкин бўлган қонун лойиҳаси ишлаб чиқилмоқда. Бу ҳақда EVERYDAY.UZ мухбири хабар қилди.
Маълум бўлишича, янги қонун лойиҳасига кўра ҳайдовчиларга автомобилни “права”сиз бошқаришга рухсат берилади. Яъни, рул бошқарувида бўлган шахсда агар Ўзбекистон Республикасида берилган биометрик паспорти ёки ИД-картаси ёнида бўлса, транспорт воситаларини бошқариш ҳуқуқини берувчи ҳужжатларни, тех. паспорт, суғурта полисини ёнида олиб юрмасдан транспорт воситасини бошқариш ҳуқуқи берилмоқда.
Шунингдек, ҳайдовчиларга рулда телефондан фойдаланишга рухсат берилиши мумкин. Янги қонун лойиҳасига кўра, ҳайдовчиларга транспорт воситасини бошқараётганда қўлларини ишлатмасдан мулоқот қилиш имконини берувчи минигарнитуралар ва бошқа техник қурилмалар орқали телефондан фойдаланиш ҳуқуқи берилмоқда. Шунингдек, транспорт воситасини бошқараётганда телефондан фойдаланиш ҳуқуқбузарлигини жазо қўлланилгандан сўнг бир йил давомида такроран содир этилгандаги кучайтирилган жавобгарлик чораси бекор қилинмоқда.
Шу билан бирга, машина салонининг олд қисмига монитор (дисплей) ўрнатганлик учун маъмурий жавобгарлик бекор қилинмоқда.
