Фарғона вилояти Қўқон шаҳри ҳокимининг биринчи ўринбосари пора билан ушланди. Бу ҳақда хабардор.уз нашри хабар қилди.
Маълум бўлишича, ҳоким ўринбосари А.Н. Қўқон минтақавий темир йўл узели молия бўлими бошлиғи ўринбосари О.М. билан жиноий тил бириктирган. Улар тадбиркорга мазкур темир йўл узели балансида бўлган 2,5 га ер майдонидаги бино ва иншоотлар бўйича ўтказиладиган аукцион савдоларда унинг фойдасига қарор чиқартириб беришни ваъда қилган. Улар тадбиркордан ушбу хизмат учун 180 минг доллар талаб қилган.
Таъкидланишича, сўралган пулнинг 10 минг доллари олинаётганда ҳуқуқ тартибот органлари ходимлари томонидан ушланган. Ҳолат юзасидан жиноий иш қўзғатилган. Улар ҳибсга олинган. Тергов олиб борилмоқда.
