Давлат активлари агентлиги давлат корхоналарининг молиявий ҳисоботини эълон қилди. Зарар кўрган корхоналар орасида пойтахтнинг иккита футбол клуби ҳам бор эди.
"Пахтакор" ва "Бунёдкор" ўтган йилги ҳисоботларга кўра зарар кўрган жамоалар деб топилди. “Бунёдкор” 2021 йилни 27 миллиард сўм зарар билан якунлади. “Пахтакор” 30,3 миллиард сўм молиявий зарар кўрди.
Қайд этиш керакки, “Пахтакор” 2020 йилда ҳам зарар кўрди. Ўшанда пойтахт жамоаси 82,7 миллиард сўм зарар кўрган. Бунгача клуб тўлиқ пойтахт ҳокимлиги тасарруфига ўтганди. 2021-йил охирида “Пахтакор” футболчилар, мураббийлар штаби ва менежерларнинг маоши учун йилига 50 миллиард сўм сарфлаётгани маълум бўлган эди. Жамоа SFI Management Group бошқарувидан кетгач, жамоанинг энг кўп маош олувчи легионери Эрен Дердиёк билан хайрлашди. Швейцариялик футболчининг маоши йилига 16 миллиард сўмни ташкил қилган.
