Кеча Ўзбекистон Суперлигаси доирасида "Бунёдкор" - "Насаф" ўртасидаги учрашув бўлиб ўтди. Унда жамоалар муроса йўлини танлади. Учрашувдан сўнг "Бунёдкор" клуби бош мураббийи Вадим Абрамов журналистлар саволига жавоб берди. Хусусан, ундан ўзбек футболида рўй берган катта ўзгаришларга муносабати сўралди.
- Аввало шуни айтишим керак, мен одамларга тош отадиган инсон эмасман. Хурсанд қилаётган жиҳати, футболимиз тепасига футболни тушунадиган одамлар келди ва улар билан футбол тилида гаплашиш осонроқ. Бунгача баъзи тушунарсиз ҳолатлар бўлиб келаётганди.
Масалан, мен ҳозир ПФЛ талаби билан галстук таққанман, ваҳоланки бундай иссиқда галстукнинг нима кераги бор? Бу одамнинг устидан кулиш билан баробар. Ҳатто мамлакатлар президентлари ҳам кўпинча турли саммитларга галстуксиз боришяпти. Мен тушунаман, агар бу баҳс Кубок финали бўлганида галстук бошқача кўринарди. Футбол - бу спорт, Чемпионлар лигаси баҳсларига қаранг, ҳамма мураббийлар мажбурий кийим кийяптими? Йўқ, албатта. Мураббий ўйинга ишлаш учун келади, чиройли кийиниб ўтириш учун эмас. Тушунганингиз учун раҳмат, - деди В. Абрамов матбуот анжуманида.
