Хабар қилганимиздек хонанда Жасур Умиров вояга етмаган қизни зўрлагани учун жазоланган эди.
Маълум бўлишича, Самарқанд вилоят прокуратураси томонидан Умиров ишида дастлаб иштирок этган ҳуқуқ тартибот органлари ходимларига жазо берилган.
Хусусан, мазкур иш бўйича терговга қадар текширув ҳаракатларини олиб борган Каттақўрғон туман ИИБ ҳузуридаги ТБ терговчисининг ҳаракатлари бўйича прокуратура томонидан терговга қадар текширув ҳаракатлари ўтказилган ва унга кўра терговчи далилларни соҳталаштирмагани, кўрсатувларни ўзгача тарзда қайд этмаганли, терговга қадар текширув ҳаракатларида иштирокчиларнинг кўрсатувларини ўзларининг сўзларидан ёзиб олгани аниқлангани учун, унга нисбатан ЖПКнинг 83-моддаси 2-бандига асосан жиноят иши қўзғатишни рад этиш ҳақида қарор қабул қилинди.
Бироқ, у ҳодиса юзасидан қонуний қарор қабул қилиш учун далилларни тўплаш, текшириш ва баҳолашда камчиликларга йўл қўйганлиги учун унга “Хайфсан” берилган.
Шунингдек, ушбу ҳолатда идоравий назоратни етарли даражада таминлай олмагани учун Каттақўрғон туман ИИБ ТБ бошлиғига ҳам "Хайфсан" берилган. Туман ИИБ бошлиғига эса “Танбеҳ” интизомий жазоси қўлланилган.
Вилоят ИИБ ТБ бошлиғининг ўринбосари лавозимдан озод қилинган.
Эслатиб ўтамиз, аввалроқ Умиров ишида қатнашган терговчининг ҳаракатлари ўрганилаётгани ва у дастлаб жиноят иши қўзғатишни рад этгани хабар қилинган эди.
